Pendakwah Kondang KH Mahmud: Aja Kakehan Pamer Omah lan Rezeki, Iri Ati Wong Liyo Kadhang Luwih Akeh Tinimbang Doane
"Berkah lan katentreman urip luwih penting tinimbang pujian saka wong liya ing media sosial"
Pacitan,JBM.co.id- Pendakwah kondang ing Pacitan, KH Mahmud ngelingake masyarakat supaya luwih ngati-ati nalika nuduhake urip pribadine ing internet. Miturut panjenengane, ora kabeh sing katon apik iku kudu dipamerake, apamaneh bab omah, rezeki, lan anak-anak.
Pesan iki uga selaras karo pitutur saka ulama Nusantara, Afifuddin Muhajir, sing nate ngendika yen wong kudu ngati-ati nalika ngunggah foto utawa nuduhake kabegjan ing ngarepe umum. Sebabe, mata wong sing nduweni rasa iri kadhang luwih akeh tinimbang wong sing tulus ndongakake berkah.
KH Mahmud nerangake manawa pamer kasugihan utawa kabegjan keluarga ing media sosial bisa nimbulake macem-macem reaksi saka wong liya. Ana sing seneng lan ndongakake apik, nanging ora sethithik uga sing bisa ngrasakake iri ati.
“Saiki zamane kabeh gampang dipamerke. Omah dipoto, rezeki dipamerke, anak-anak diunggah terus. Nanging kudu dielingi, ora kabeh wong sing ndeleng iku seneng. Kadhang ana sing nyawang karo rasa iri,” ujare KH Mahmud, Rabu (18/3/2026).
Panjenengane uga ngajak umat supaya luwih akeh ngucap syukur marang Gusti Allah tinimbang pamer marang manungsa. Miturut KH Mahmud, berkah lan katentreman urip luwih penting tinimbang pujian saka wong liya ing media sosial.
Kanthi pesen iki, KH Mahmud ngarepake masyarakat luwih wicaksana nggunakake teknologi lan media sosial. Nuduhake kabegjan ora salah, nanging kudu tetep njaga adab, kesederhanaan, lan ora nganti nyebabake iri ati saka wong liya.
Yen perlu, panjenengane nyaranake supaya kabegjan luwih becik disimpen lan disyukuri bareng keluarga, amarga berkah sejati iku asring tuwuh saka rasa syukur lan kerendahan ati.(Red/yun).
