Nalika Doa Diijabahi: Pitutur KH Mahmud Bab Sabar Lan Usaha Ing Ngenteni Wektune Gusti Allah
"Sikap sabar lan istiqomah iku dadi kunci utama supaya manungsa ora gampang nyerah ing ngadhepi ujian lan pangarep-arep sing durung kelakon"
Pacitan,JBM.co.id- Pendakwah kondang KH Mahmud ngandharake pitutur kang nyentuh ati babagan makna doa lan pangarep-arep marang Gusti Allah. Miturut panjenengane, nalika manungsa diparingi kekuwatan kanggo ndedonga marang sawijining perkara, iku wis dadi pratandha yen Gusti Allah paring dalan supaya perkara kuwi bisa kelakon.
“Yen Allah ngijini kowe ndedonga kanggo sawijining perkara, kuwi tegese Allah uga ngijini kowe kanggo nampa asil saka doa kuwi,” ujare KH Mahmud, Rabu (11/3/2026).
Panjenengane nerangake, akeh wong kerep kesel lan putus asa nalika doa durung langsung dikabulake. Nanging sejatiné, wektu pangabulane doa iku gumantung marang kawicaksanan Gusti Allah sing paling ngerti kapan wektu paling becik kanggo hamba-Nya.
Mula saka iku, KH Mahmud ngajak umat supaya ora kendhat ngulang doa lan usaha. Doa kudu terus dipanjatake kanthi ikhlas, lan usaha uga kudu dilakoni kanthi temen lan sabar.
“Baleni terus doamu, baleni terus usahamu. Aja nganti kesel nyuwun marang Gusti Allah. Amarga ana wektu nalika Gusti Allah ngendika: iki wis waktune,” terangé maneh.
Miturut panjenengane, sikap sabar lan istiqomah iku dadi kunci utama supaya manungsa ora gampang nyerah ing ngadhepi ujian lan pangarep-arep sing durung kelakon.
Pangandikane KH Mahmud iki dadi pangeling-eling kanggo para jamaah yen saben doa ora tau muspra. Senajan durung langsung diwujudake, saben panyuwunan mesthi dirungokake dening Gusti Allah, lan bakal diparingi jawaban ing wektu sing paling pas miturut kersane.
Kanthi pitutur kasebut, KH Mahmud ngarepake supaya umat Islam tansah njaga pangarep-arep, terus ndedonga, lan tetep berjuang nganti tekan wektu nalika Gusti Allah maringi jawaban paling apik kanggo saben panyuwunan hamba-Nya.(Red/yun).
